25

பிறர் கவிதை விமர்சனத்தில்
எலியட், ஷெல்லி வம்பிற்கிழுப்பேன்
கலாச்சாரத்தின் பிரவாகப் பள்ளத்தில்
தாஸ்தாயெவ்ஸ்கி நிறைந்துள்ளார் என்பாய்

பெண்ணின் மனது
கற்றிட வேண்டிய வெற்றிடம் என்பேன்
ஆண்கள் காற்றில்
சுற்றிட வேண்டிய வெற்றுத்தாள் என்பாய்

அமெரிக்கப் பொருளாதார வீழ்விற்கு
ஹிட்லரின் மரணத்தை காரணமாக்குவாய்
மாங்காய் விலைச் சரிவிற்கும்
மார்க்சியத்திற்கும் தொடர்புள்ளதென்பேன்

பேருந்தின் நெரிசல் பயணத்தின்
வியர்வையில் நசுங்கி மீண்ட உனை
நீ அழகென நானுரைத்தபோது
அழகென்பது விழிவழி
வெளிவந்த பார்வைவலி என்பாய்

வாகனம் ஓய்ந்த பாலத்தினொரு
சாயங்கால நடையில்
எனைப் பிடிக்குமென நீ பகர்ந்தபோது
பிடிப்பதும் பிடிக்காதிருப்பதும்
மனப்பிறழ்வின் நெகிழ்தகவு என்பேன்

புரிதலில் சிலபடிகள் கடந்தவொரு
தூக்கம் தொலைத்த தொலையுரையாடலில்
காதல் துளிர்ப்பதற்கும்
கத்திரி சாகுபடிக்குமான
ஒப்புமை குறியீடுகளில் மூழ்கித் திளைப்போம்

அறிவு ஜீவியாய் நீடித்திருப்பது
அலுப்புத் தரும் விஷயம் தான்

வாயேன் காதலிப்போம்!

***